पोखरा, बैशाख २३
अन्नपूर्ण हिमश्रृखंला अन्तर्गत कास्कीको दुर्गम हिमाली भेगमा आज विहान हिम पहिरो जाँदा सेती नदीमा पानीको बहाव अत्यधिक मात्रामा बढेको छ । विहान ९ बजेतिर गएको हिम पहिरोका कारण सेती नदीमा आएको पानीको बहावमा परेका ६ जनाको शव भेटिएको छ भने, भने अन्य दर्जनौ मानिसहरु बेपत्ता भएका छन् ।
हेम्जाको याम्दी दोभानमा ३ वटा, मनिपाल नजिकै १, भजुङखोलामा १ र रामघाटमा १ गरी ६ वटा शव फेला परेको प्रहरीले जनाएको छ । विहान ९ बजेतिर हिम पहिरो गएपछि बढेको पानीको वहावका कारण भुजुङखोलास्थित सेती किनारमा रहेका पुल, घरटहरा, केही रेस्टुरेन्ट समेत बगाएको मिर्सा गाउँकी बुद्धिकुमारी गुरुङले जानकारी दिनुभयो ।
प्रहरीले जानकारी दिए अनुसार खारापानीका ५० भन्दा बढी मानिसहरु बेपत्ता भएका छन् भने पानीले बस्ती नै बगाएको छ । घरपालुवा गाई, भैसी लगायतका चौपायाहरु पनि ठूलो संख्यामा बगाएको जनाइएको छ । हेम्जाको म-याङघाटस्थित सेती नदी किनाराबाट बाट ५ वटा ट्रक बगाएको र स्याङजाको निजी स्कूलबाट विद्यार्थी लिएर पिकनिकका लागि पोखरा आएका २ वटा बस समेत बगाएको प्रत्यक्षदर्शीले जानकारी दिएका छन् ।
पिकनिकका लागि आएका ३ जना भने सकुशल रहेको र उनीहरुको मनिपाल अस्पतालमा उपचार भइरहेको प्रहरीले जानकारी दिएको छ । नदीमा पानीको वहावका कारण घाचोकको तल्लो क्षेत्रमा राखिएका केही ट्रक, गिद्ध रेष्टुरेन्ट र गाई फार्म समेत बगाएको छ । बाढीको कारण स्थानिय भुजुङखोला खारपानीमा रहेका बस्ती नै विस्थापित भएको स्थानीयबासीले जनाएका छन ।
कास्की प्रहरीका अनुसार पानीको उच्च बहावका कारण हुन सक्ने क्षतिलाई मध्यनजर गर्दै भुजुङखोला, हेम्जा, पोखराको रामघाट, लालटिन बजार, गाइघाट लगायतका स्थानमा स्थानीयबासीलाई सचेत गराउनुका साथै २ सय ५० भन्दा बढी घरपरिवारलाई सुरक्षित स्थानमा स्थानान्तरण गरिएको छ । हरेक १० मिनेटको अन्तरमा पानीको बहाव घट्ने बढ्ने गरेको छ ।
यसैबीच, प्राप्त पछिल्लो जानकारी अनुसार कास्कीको भजुङको खारपानी बजारमा रहेका १४ भन्दा बढी पसलहरु हिमपहिरोपछि आएको बाढीले बगाएको छ । प्रारम्भिक जानकारी अनुसार हिम पहिरो गएको हुनसक्ने अनुमान गरिएपनि हिमपहिरो गएको हो वा हिमताल फुटेको हो एकिन हुन सकेको छैन । जलवायु परिवर्तनका कारणले यस्तो प्राकृतिक विपद् आएको हुनसक्ने विज्ञहरुले वताएका छन । घटनाको विस्तृत जानकारी आउन बाँकी छ ।
हेर्नुहोस् भिडियो
Post a Comment
कृपया प्रतिक्रिया दिनुहोस्