डडेलधुरा , चैत्र १३,
विभिन्न संघसंस्थाको आर्थिक सहयोगमा १० कक्षासम्म पढाइ पूरा गरेर एसएलसीमा राम्रो श्रेणीमा उत्तीर्ण हुने आशा गरेकी एक छात्रा सामूहिक बलात्कारपछि मानसिक अस्पताल भर्ना भएकी छन् ।
बैतडी पाटनमा आफन्तको घरमा बसेर एसएलसी दिइरहेकी उनलाई बिहीबार राति डेरामै गएर गाजर गाविस ३ का सागर भट्ट र भुमेश्वर २ का अमर अवस्थीले सामूहिक बलात्कार गरेपछि उनले मानसिक सन्तुलन गुमाएकी हुन् । 'दुवैमाथि सामूहिक बलात्कार मुद्दा दर्ता गरिएको छ,' बैतडीका प्रहरी नायब उपरीक्षक विष्णुबहादुर कार्कीले भने, 'जिल्ला अदालतबाट १५ दिने म्याद थपेर अनुसन्धान सुरु भएको छ ।'
सामूहिक बलात्कारपछि मानसिक सन्तुलन गुम्दा उनले आइतबारको विज्ञान परीक्षा दिन सकिनन्,' कार्कीले भने, 'जोर जोरले चिच्याउने, दगुर्ने, एकोहोरो टोलाउने, एउटा कुरा सोधेपछि अर्को कुरा बोल्नेजस्ता लक्षण देखा परेका छन् ।' छात्राको आँखा, टाउको र खुट्टामा चोटसमेत लागेको छ ।
विद्यालयले विशिष्ट श्रेणीमा उत्तीर्ण हुने आशा गरेको थियो,' उनको विद्यालयका एक शिक्षकले भने, 'गरिब घरकी छोरीको जीवन नै बर्बाद भयो ।' उनी हरेक कक्षामा प्रथम हुँदै आएकी थिइन् । 'विभिन्न निकायको सहयोगमा उनको उपचारका लागि पहल भएको छ,' प्रजिअ गोविन्दमणि भुर्तेलले बताए । जिविस, नगरपालिका, महिला विकास र जिल्ला प्रशासनको सहयोगमा उपचारार्थ काठमाडौं पठाउने तयारी भएको भुर्तेलले बताए । आफन्तको घरमा डेरा गरी कृष्ण उच्चमावि पाटन केन्द्रमा एसएलसी दिइरहेकी उनीमाथि भएको घटनाको महिला अधिकारवादीले विरोध गरेका छन् ।कान्तिपुरदैनिक
Post a Comment
कृपया प्रतिक्रिया दिनुहोस्