एसएलसी शान्तिपूर्ण

काठमाडौ, चैत्र ७ - एसएलसी परीक्षाको पहिलो दिन मंगलबार अंग्रेजी विषयको परीक्षा शान्तिपूर्ण भएको छ । परीक्षा नियन्त्रण कार्यालय सानोठिमीले परीक्षा मर्यादित, भयरहित र शान्तिपूर्ण भएको जनाएको छ । देशका केही केन्द्रमा अनियमितता गर्न खोज्नेलाई नियन्त्रणमा लिएर कारबाही प्रक्रिया थालिएको नियन्त्रक डिल्लीराम रिमालले बताए ।
जिल्लाका केही केन्द्रमा निरीक्षक, नक्कली निरीक्षक/परीक्षार्थी तथा परीक्षाको मर्यादा उल्लंघन गर्ने केही विद्यार्थी निलम्बन भएका छन् । मध्यमाञ्चल क्षेत्रीय शिक्षा निर्देशक जीवन शर्मा पौडेलका अनुसार तराईका जिल्लामा पनि परीक्षा अपेक्षाअनुसार मर्यादित भएको छ । 'परीक्षा भयरहित शान्तिपूर्ण देखिएको छ,' बारा, पर्साको अनुगमनबाट फर्केका उनले भने, 'अनियमितता गर्न खोज्नेलाई तत्काल नियन्त्रणमा लिइएको छ ।' उपत्यकाका केन्द्रहरूमा परीक्षामा कुनै समस्यामा नआएको काठमाडौंका जिल्ला शिक्षा अधिकारी बैकुण्ठ अर्यालले बताए ।